Aurkezpena

Euskalingua 12 honek sei artikulu eskaintzen ditu; eurotarik hiru, Eneko Barrutiarena, Ibon Coterónena eta Mitxel Kaltzakortarena, hain zuzen, jarraipenekoak dira; Gotzon Aurrekoetxea zein Aholab ohiko autoreak dira eta, lehenengoz Euskalingua aldizkarian Piarres Charriton.

Eneko Barrutiak Mundakako arrantzaleei egineko grabazioen transkripzioa (II) izeneko artikulua aurkezten dau, itsasertzeko herrietako arrantzaleei egindako grabazioen transkripzioarekin hasitako harilari jarraituz, arrantza langintzako lexiko berezituaren barri zehatza aurkitu daiteke eurotan; hasierako xedea lexikoa izan arren, lexikoaz gan, edukietan be aberastasuna darie grabazio honeei.

Gotzon Aurrekoetxeak Bariazio soziolinguistikoa Dimako euskaran izeneko deskripzio lana dakar, non adin diferenteetako informanteen arteko erkaketa zehatzaren barri emoten dauan; besteak beste, hizkuntzaren aldaketan adina aldagai garrantzitsua eta eraginkorra dala ondorioztatu daiteke.

Ibon Coterónek Apuntes de filosofia del euskara III tituludun hiru artikuluko segidaren azken atala eskaintzen dau; lehenengoa Euskalingua 10en dago irakurgai, bigarrena
Euskalingua 11n eta hirugarrena Euskalingua 12 honetan. §§ 6-7 zatiak garatzen ditu, intonazioa, sintaxia eta semantikaren arteko harreman haratzaren azalpenaren bila. Intonazioaren nondik norakoak, aurrekoek finkatutako zenbait teoria eta gehienetan besterik gabe onartuta dauden ideia, autorearen ustez, faltsuak kritikatzen ditu, § 7 za
tian konklusioak eskainiz.

Mitxel Kaltzakortak, galdegaia dala eta, S. Altubek proposatutakoaren kontrako adibideak aurkezten ditu. Euskalingua 10en eta 11n Galdegaia hasikera perpausetan (I) eta
(II) dira irakurgai, hurrenez hurren. Euskalingua 12n Galdegaia testu osoetan (I) dakar eta hurrengoan honen ondorengoa eskaintzeko asmoa dau autoreak. Guztiotan hasierako tesiari eusteko azterketa egiten dau eta horretarako datuak aurkeztu.

Autore barria Euskalinguarako, hizkuntza eta literaturan ezaguna, oso, Piarres Charriton. Medikuak euskal literaturan izenburuak argi adierazten dau gaia. Charritonek berak hasieran dinoskunez “Apezek (…) leku izigarria hartu dute euskal literaturan. (…) gure aintzineko literaturari hurbiletik behatzen badiogu (…) legegizon, maisu, kapitain eta oroz gainetik, asko mediku.” Horreetariko hamalau aurkezten ditu, XVII. mendetik XX.era. Mendeetan aurrera egin ahala, mediku-idazle kopuruak gora
egiten dau eta XIX. mendean jaiotako bederatzik izten dabe zerrenda. XX.ekoak aipatuta daude baina, ikerketa bidea irekita geratzen dela aipatzen dau autoreak, bai hegoaldeko mediku idazleen bilaketa lana egiteko, bai alde bateko zein besteko XX. mendekoena egiteko, alegia.

Aholabek Hizlaria egiaztatzeko euskarazko eta gaztelerazko datu-base elebiduna eraikitzen izeneko artikulua ekarri dau. Sistema elektroniko bidezko eragiketetan, norbera aurrean ez dala, norbere burua gero eta zehatzago identifiketako baliabideen aurrerapena da ikerketa hau, bestela esanda, norbanakoaren identifikaziorako pasahitza erabili
beharrean identifikazio biometrikoa erabiltzeko pausuaz dihardu. Hain zuzen ere, hizkuntza anitzeko inguruetan hiztun elebidunei hizkuntza aukeratzeko modua eskaini ahal izatea du gogoan eta horretarako behar diren ezaugarri biometrikoen datu-basearen diseinua eta osatzea azaltzen dira Aholab ingeniari taldearen artikulu honetan.

Artikuluen zerrenda

Euskalingua 12ren aurkezpena
Maribi Unamuno

Mundakako arrantzaleei eginiko grabazioen transkripzioa (II)
Eneko Barrutia

Bariazio soziolinguistikoa Dimako euskaran
Gotzon Aurrekoetxea

Apuntes de filosofia del euskara, III: contra la asimetría entre sujeto y objeto; §§ 6-7
Ibon Coterón

Galdegaia testu osoetan (I)
Mitxel Kaltzakorta

Medikuak Euskal Literaturan
Piarres Charriton

Hizlaria egiaztatzeko euskarazko eta gaztelerazko datu-base elebiduna eraikitzen
Iker Luengo, Eva Navas, Iñaki Sainz, Ibon Saratxaga, Jon Sanchez, Igor Odriozola, Juan J. Igarza eta Inma Hernaez