Aurkezpena

Euskalinguaren 6. zenbaki honetan ohiko arloei dagokien zazpi artikulu irakurtzeko aukera izango duzu.

Batuketaren arloan, Gaminde eta bestek Ereñon baturiko kantuak (lo kantuak, olgatzeko kantuak, jaieguneko kantuak eta errezitatuak, besteak beste) dakartzate, batzuetan partitura eta guzti. Dakizuenez, Euskalinguan leku berezia egin gura diogu Mendebaldeko ondarearen batuketari.

Beste korpus aldetiko behar bat aurkituko duzu zenbaki honetan: Mtz. de la Cuadraren Nabarnizko hiztegiaren L, M eta N-z hasitako berbak ditugu, hiztegi mardularen bosgarren atala, hain zuzen. Aurreko ataletan bezala, lexikoa batu ez ezik fraseologia eta adibide erabilerak ere eskaintzen ditu bertan.

Fonetika arloan, Gamindek “Aditz partizipioen jotaren ebakera zubereraz” izeneko artikuluan Zuberoako hamar herrietan jota zelan ebakitzen den aztertu ostean frikari zein afrikaria izan daitekeela erakusten digu eta Bizkaiko herri batzuetako datuekin konparaketa egiten du.

Aplikazioaren eremuan, Karmele Perez Urraza “Xabiertxo eta Sabin, eskola liburutako ikasle eredugarri” artikuluan eskola liburu biren edukiaren azterketa ideologikoa egiten du –dakartzaten estereotipoak eta imaginarium politikoa, esate baterako- modu kuantitatibo zein kualitatiboan. Xabiertxo eta Sabin euskalduna testu-liburuetako pertsonaiak biak euskal kulturaren balioak zabaltzeko erabili badira ere, liburu batean eta bestean modu diferentean egin dela erakusten digu Perez Urraza irakasleak.

Telleriaren “Teatro-hizkera euskaldun barri bizkaitarbaten begiradatik” 2004ko maiatzean Mendebaldek egin zituen VIII jardunaldietan aurkeztutako txostena da. Orduan jardunaldietako liburuan ezin izan zen argitaratu eta irakurlearentzat interesgarria izango delakoan Euskalinguan dakargu. Euskara erabiltzaile eta antzerki-idazlea den Telleriak gure hizkuntzaren erabileraz zenbait ohar ematen ditu.

Bilbao eta besteren “Basque Textbooks in the 20th Century: the Contents and the Context” artikuluan eskola testu-liburuen garapena aztertzen da, XIX. mendetik gaur egun arte testu-liburuak bai itxuran –ikonografiaren erabileran, esate baterako- bai edukian zelan aldatu diren, hain zuzen. Aztertutako testu-liburuetan XIX. mendetik ikonografia nabarmen ugaritu da, ulergarritasunaren mesederako autoreen iritzian. Testu-liburuon edukiari dagokionez, curriculuma zein testuingurutan ageri den aztertu dute, argitalpenaren hizkuntza eta argitalpen-lekua kontuan izanik.

Azkenik, “HIZKING21: Gaitasun linguistikoak dituzten sistemetan hizkuntza baliabide eta tresnak barneratzen” lanean Hernaez eta bestek Hizking21 proiektuaren berri ematen digute. Euskal hizkuntzaren prozesamenduan dauden baliabideak aprobetxatu eta elkartuz hizkuntz industriarentzat erabilgarri izan daitezen produktu ezberdinen arteko egokitzapena egitea du helburu Hizking21 proiektuak.

Artikuluen zerrenda

Euskalingua 6ren aurkezpena
Esti Amorrortu

Ereñoko Faustinaren altxorra
Iñaki Gaminde, Amaia Aldamizetxebarria, Esther Elgoibar eta Jon Gaminde

Nabarnizko Hiztegia (L, M eta N letrak)
Alberto Martínez de la Cuadra

Aditz partizipioen jotaren ebakera Zubereraz
Iñaki Gaminde

Xabiertxo eta Sabin, eskola liburutako ikasle eredugarri
Karmele Perez Urrraza

Teatro-hizkera euskaldun bizkaitar baten begiradatik
Patxo Telleria

Basque textbooks during the 20th century
Begoña Bilbao, Gurutze Ezkurdia eta Karmele Perez Urraza

Hizking XXI: gaitasun linguistikoak dituzten sistemetan hizkuntza baliabide eta tresnak barneratzen
Inmaculada Hernaez, Eva Navas, Arantza Diaz de Ilarraza, Rafael Saiz, Nora Mendoza eta Imanol Madariaga